Clayton F Hlungwane i mutsari tlhelo muhumelerisi loyi a velekiweke hi ti12 ta Nyenye-nyani 2002, eShawela block 23, Giyani, Limpopo. U sungurile tidyondzo ta yena ta le hansi exikolweni xa Baleni na Khwezu, kutani ta le henhla a ti endla eMukula sekondari laha a nga ba ntambu hi lembe ra 2021. Clayton u velekiwile ni vamakwavo ku nga Boitumelo na Nthabiseng, kasi hi lembe ra 2022 Xikwembu xi n'wi katekisile hi n'wana wajaha, ku nga Andziso Nhlelo Hlungwane.

U ve na ku navela eka swavutsari loko a ha ri na khumembirhi (12) wa malembe laha a endla giredi ya ntlhanu (5). Laha a nga sungula hi ku tsala switori leswi a swi tlhela swi tlangiwa hi yena ni vadyondzikulobye. Kutani hi lembe ra 2016, a xiximiwa hi xitifikheti xo kombisa vutshila lebyi a veke na byona loko swi fika eka mitirho yakwe yo tumbuluxa, hi xikolo xa le hansi xa Baleni. Kasi u kandziyisile tsalwa ra yena ro sungula hi 2023.

Hi lembe ra 2023 u simekile Nhlalala ya vulombe publishers. Leyi yi nga tikombisa ku tirha kahle swinene hikuva hi lembe yi kotile ku kandziyisa tibuku to ringana khumembirhi (12).

Tin'wana ta tibuku leti Clayton F Hlungwane a ti tsaleke hi leti landzelaka:

• Swi ta lungha (Xitsonga Novel, 2023)

• Mandlakulova (Xitsonga Novel, 2023)

• Manyunyu lawa! (Xitsonga Novel, 2024)

• Xiyimo... (Xitsonga Novel, 2024)

• Lundza (Xitsonga Novel, 2024)

• Maphokolo ya mbilu (Xitsonga Novel, 2024)

• KHOMBO ? NKATEKO! (Xitsonga Novel, 2025)